【香港輕新聞】擁有眾多女粉絲的公民黨議員楊岳橋（AY），愛情事業雙豐收，不僅於月前接棒出任黨魁，在兩周前與女友北歐旅行時，更「一擊即中」成功「脫毒」。而「志雲大師」陳志雲更在FB上載短片，公開其陳姓女友的「廬山真面目」。
陳志雲未說明條片拍攝的具體日期，但似乎是岳少求婚前，探班大師的舞台劇時所拍。只見片中志雲大師盞鬼哋將岳少的女友拉入鏡，「呢個係你女朋友，橫掂都嚟咗，見吓嘛」，一向冷靜嘅岳少當堂神色慌張話「呢啲唔好上鏡啦」，不過志雲大師當然唔理，仲迫問究竟求咗婚未，岳少引用名言：「to求or not to求, that is the question」。
岳少對傳媒回憶兩周前求婚的過程，他表示當時非常緊張，在求婚前一晚更失眠，「估唔到自己平時見慣風浪，都會咁緊張，好驚唔可以一take pass」；又指本打算在北極光下求婚，惟當時「等極都等唔到極光」，只好在漆黑一片中求婚。
至於幾時拉埋天窗，岳少話結婚需顧及雙方家長意願，而且想低調處理婚事。岳少透露女方姓陳，叫Eve，係事務律師。兩人經朋友介紹，相識至今大約4年喎！他又鼓勵萬千粉絲：「希望大家一齊努力，早日『脫毒』！」
http://litenews.hk/?p=26206
留言
張貼留言